تاسيتي نيوز

البكارة في السنارة لعادل سيدأحمد الحلقة "26" : بداية "مأساة" بلوم..!

 

ساد الهدوء..وقلت الحركة..وخفت الضجيج، في الشقة..فضلاً عن سكون الليل، الزاحف نحو (ثُلثهِ الأخير) ..

،،،،،،،

لقد انتشر السبعة أولاد،مع (قريناتهم)..!(إتنين إتنين).. وشوشات..ومقالب وضحكات..!

،،،،،،

وكان أن دخل المطبخ، بعضهم..أعدوا (سندوتشات) متنوعة..تتماشى مع جيل، يحب الـ(تيك أوي)، ويعشق الـ(ديليفري)..!

هوت دوق.. بيتزا.. أندومي.. جيبس.. وكاتش أب..!لم يسمعوا ب(القراصة، مع الويكه أم دقوقا)..ولا يعرفون (مُلاح الكول).. ويتقززون من (التركين والملوحة)..ويلتبسون، حينما يسمعون باسم (الشرموط).. !َ

لو قلت للواحد منهم :أنا عازمك (فسيخ)..حا يقول ليك:(ياي) ..!

،،،،،،،

الأمر أصبح مَريجاً،، حيث إختلط الحابل بالنابل: إنفرادات مريبة.. خلوات حامية..

،،،،،،،

ولكن "جميلة" أصرت أن تستمر في حوارها(المثير والجرئ)، مع الولد (الطاعِم الأغبر) "بلوم"..

* سألته: أها يابلوم.. قلت لي عمرك كان زي "٦" سنوات.. وأمك وأبوك، كانوا في حالة مشاكل شديدة، ومشاجرات عنيفة..!

- أجاب، بحسرة، قائلاً:الحلة كلها، كانت بتتفرج علينا.. أبوي كان بيضربنا نحن ذاتنا، أنا وأخواتي..!

* قالت له:سمعتك قلت (أخواتي)..يعني ما عندك أخوان؟!

- قال لها :نحن أربعة..ولد و"٣" بنات ..!

*قالت له :موضوع الوالدين دا، إنتهى وين؟!

* قال بحزن غائر :إطالقو.. زي ما قلت ليك، أمي إطلقت بالمحكمة.. ومشينا قعدنا حوالي "٦"شهور، في بيت (جدو وحبوبة)..وبعداك: أبوي عرس..وأُمي عرست، (راجل) تاني..!!

،،،،،،،

* قالت له:وإنت قعدت وين؟

- قال لها: قعدت سنتين، في بيت جدي..ولمن خالي ساق (حبوبة) معاهو،بعد وفاة جدي.. أُمي (أصرت) أنا أمشي أسكن معاها.. ما كنت عاوز.. عشان كدا قعدت مع (حبوبة)، في بيت خالي..! خالي معاهو زوجتو، وولدين وبت..!

* قالت له:طيب كويس.. حبوبتك زي أمك.. والخال زي الوالد..بيرعاك ويخاف عليك.. و.. !

- قبل أن تكمل، قاطعها قائلا:ويخاف من مرتو..

*قالت له:كيف يعني؟!

- قال لها بتهكم :الكيف جبنه وشاي..

* قالت له:لا بالله.. وريني، إنت قاصد شنو؟!

- قال لها :خالي (محسن) دا، كان بخاف من مرتو، خوف الجن..!

*"جميلة" قالت له، بسخربة عالية:طيب مالو.. ما كل الرجال، بخافو من زوجاتهم.. وقالوا: الراجل الـ ما بخاف من مرتو، ما راجل..

من بين رحم أحزان (بلوم)، خرجت ضحكة (خائبة):

- هي هياااا كا.. يا (جِم جِم)..!أنا شوفتََ بعيني. مافي زول قال لي،(يا إنتي)..!

،،،،،،،

"جميلة" أحست بالخوف، لأن (بلوم) وضعها في سياق (حِم حِم)، اسم دلع (حِمِش)،وهو المُعادل الذكوري لهذا الغابر..!ولكنها " لم تخش مطلقاً،من "بلوم"، لأن(الجنس للجنس رحمة)..!!

،،،،،،،

- (بلوم) إسترسل قائلاً :يا أخي ،خالي دا، لمن مرتو تقول (يا مح...)، بجي جاري.. مع إنو عندو ولدو الكبير إسمو محمد..!! مرتو دي، ورتني الويل، وسهر الليل.. وبسببها،أنا شردت من البيت "٨"مرات.. إتشردت فيها..!

أنا عشت طفولة صعبة يا جميلة.. أبوي وأمي إستمتعوا بالدنيا.. وخلوا الدنيا (تستمتع) بي..!!

،،،،،،،

-(بلوم) دخل في نوبة بكاء حادة..وظل يردد:

(أنا ضحية.. أنا ضحية..عشان كدا (حقروا) بي، في بيت خالي.. وبعدها، عشت فترة مع أولاد "راجل أمي"..كانوا عايشين في نعيم..وأنا داخل النعيم، في جحيم"طلعت من الجنة، وسقطا"..!. ُأمي على صدر رجل آخر..وأولاد زوجها، كانوا بيعتبروني "خدامهم")..!

،،،،،،،

(بلوم) ختم جانباً من مأساته، بالقول المحزون :(حصلت لي حادثة كبيرة، بسببها هربت من البيت..من هنا بدأت المصائب، "تتحلحل على") ..!

سعر الجنيه السوداني الآن
رأي ومقالات
هلالويا  ونص وخمسة يا حمدوك !!
 لن يأتي خير لمايكل أفندي على يد الغوغاء الذين دمر آباؤهم كنائس سوبا بمعمارها الخرافي وحدائقها البهية برسومات فنانيها ال
الأوفياء يحتفلون بعزيز لدينا ولهم...
لم يجف الدمع علي علي السيد ..إذ بنا نفجع في عمنا واستاذ الهدوء والصبر والسكينة الاستاذ تاج السر محمد صالح .. رحل صاحب ال
ثلاث تجمعات للمهنيين(1964-1985-2018)في حياة الإمام (4-5)
كان الإمام ذو حس فكاهي، يتعاطى النكات والدُعابة ويصنعها، وحينما وصلنا إلى العاصمة أديس أبابا في ديسمبر 2014م وبعد تعقيدا
ثلاث ثورات وثلاث انقلابات في حياة الإمام 2
يواصل الكاتب في سللة مقالاته ذات الطابع التوثيقي لحقبة المهمة من تاريخ السودان تمحورت حول شخصية الإمام الصادق المهدي