عادل سيد أحمد

استراحة الجمعة... ** كورونيات ** .. الرجال موعودون ب"طفرة"(خائبة) .

أيها الرجال.. "شدوا حيلكم"شويه.. فأنتم موعُدون ب"طفرة" (خائبة) ..!!،،،،،،،،،،،،

إن سلوك الإنسان، مرتبط بالبيئة التي يعيش فيها..

وزماااااااان، عالم الأحياء (الما عندو شغلة داك،) مندل.. وأثناء (هروبو) من البيت..دخل (الغابة).. ولاحظ حاجتين:

- هناك صفات (موروثة)، داخل الكائن الحي.. وهذه (محشورة) داخل الجينات.. وأن الذكر يحمل(xx).. بينما (حريمنا) - طيب الله "ثرانا" - يحملن (xy)..!

يعني نحن داخلين بـ(فرصتين)..الهزيمة أو الشهادة !!

لذلك فإن المتحكم في (نوع الجنين) هو الرجل..

رغم أنه (الغبيان) بيزعل. حينما تلد زوجته بنتا..!.

- وهناك صفات (مكتسبة)..إذ تأتي للإنسان من الطبيعة أو البيئة المحيطة به.. هنا قد تحدث (الطفرات)..أو (الطامات)..!! ودا الخائبين - أقصد الخائفين - منو نحن ذاااااتو..!

×××××

(قفلة البيت) دي، وفرت أكبر مناخ لـ(الطفرة السالبة).. وأديكم نماذج لـ(عينة عشوائية)، لاحظتها:

- سلوك الرجال (الجديد)،بدأ "يخيب" .. فكلماتنا أضحت لا تخلو من (ميوعة)..إذ دخلت فيها مفردات (طفرية) "خطيرة" .. مثل(الغسالة بايظة).. وصابون العدة قطع..والليلة حا أعمل ليكم حلة"مدنكلة".. يا بت ناوليني (مرقة الجداد) دي..

وخلوني (أشُر) ليكم (الهدوم).. وياحليل (ناس كلتوم)..!

ودايرين بالعيش شنو.." وشكرا حمدوك".. الفطير حلااااااااتو.. عيبوهو لي..! " الرواب" وينو..خمروا لي العجين..جيبو لي (الطايوق)، عشان أختو على الصاج..يابت ناوليني (القرقريبة)، عشان داير أعوس ليكم الكسره.. ..!

،،،،،،،،،،،،،،،

أنا - مثلا - في حياتي ما شُفتَ، ولا سمعتب(الكراويا واليانسون وحق الجار)..!.("يعميني عمى التُرب")..!

***

إن فترة حضانة الكورونا، والتي ضاعفت معاناتنا.. وهددت رجولتنا.. وعاوزه تقفلنا تاني، لمدة(٣)أسابيع، متواصلة..حا تخلي (قصتنا) بايظة..وحا تعيشنا في(الوكر المهجور).. وحا تدخلنا في المرحلة الثانية من (الخياخة)، و"جرجير الكلام" ..إذ سنسمع كلاما من الرجل (الفضل)، على شاكلة ( سجمي، والرماد كالني.. وأجي يا دي)..َوجيبو لي (محلبية وسرتيه)..ووب عليا !!

**

- لاحظت كذلك، إننا أصبحنا ب(نتهرش)، لأتفه الأسباب..ومن أول نظرة.. مثلا: قبل يومين، تصادف أن إلتقيت برجل، ومعه زوجته(في اسانسير).."الراجل" منتهي.. شوف يمينو.. وعاين شمالو:شايل (شافع)، بيدو اليمين.. وكيس(فاضي)، بيدو الشمال.. ومعلق ليهو شنطة (هاند باك)، على ضهرو..!ورابط ليهو حاجة كدا، زي (القِربة)، في نص بطنو..!! ماباقي ليهو إلا (الزُمام)في النخرة.."والحِجل"في الرِجل.! الجنني إنو فرحان جدا ومنتشي..ومبسوط من الوضع دا..ولا "خصاهو"..(بيطقطق)في لبان (لادي).. و"فائحه" منو ريحة (بخور تيمان)، مخلوط ب(طلح.. وشاف).. منو ال طفا النور..!!

ووشو لاااااااامع.. (مدعووووك)ب(دلكة)..!!

سمييييييح ووديع..

وهدي ورضي..وطاااااااااااعم.. !خلا جماعتو..وغزا عينو فيني..! وأنا بعاين ليهو..حسيت إنو أنا بخير..!!(وأنا مابفسر..والديامي ما بقصر)..!!فجأة كدا، (الأسانسير) باظ.. ونحن معلقين، بين السماء والأرض..جا علي.. وخلا مرتو..وهو "مرعوب".. مرتو جرتو عليها..(تذكر) أنه رجل.. فقال ليها ب"آخر نفس" :(حا نعمل شنو هسي، يا "حبيبتي")..!الغريبة إنو بتكلم معاها.. وبعاين لي..! في الحقيقة، أنا إنزعجت جدا من كلمة (ياحبيبتي) دي.. إذ إعتبرتها إحدى علامات إنتكاسات الرجل، و(هضربات) كورونا..!×××××من يوم (الأسانسير) داك.. بطني طمت(ليمون ما حلاني)..الـ" ١٠٠ " ليمونة، بقت ب"٤٠٠"جنيه،يا برهان..!! من (محاولة) التحرش بي، بـ(الأسانسير)، بقيت خائف، الموضوع يطور، وأوضاعنا تسوء أكتر..!!

،،،،،،،،،،،،

كذلك، سمعت قبل أيام..والعهده على (الواتساب)..إنو في واحد(كان راجل).. أثناء ما بقطع في (السلطة).. إنجرح(بالسلاح البيهو مره، جرحتني)..! كورك لمرتو(المفترضة) .. وهو (بيجرجر) في الكلام:(ناوليني "فوطة" من القطن بتاعك، الخاتاهو في الضلفه الفوقانية، في دولابك، يا عشوش)..!! ،،،،،،،،،،،،، "صدقوني".. و(حياة غرامنا) ..بالطريقة الشايفة أنا دا.. (كورونا) دي، لمن تنتهي من حضانتا..وتقوم من ال "٤٠"..نكون نحن ولدنا..!!

سعر الجنيه السوداني الآن
رأي ومقالات
في المسألة الكيزانية " 2".. كذبة(القصر وكوبر)..!
ماذا ستقولون أمام الله،عن سحل"الخير وهزاع وسنهوري
في المسألة الكيزانية "1"
شيخكم رماكم بأفظع نعوت الفساد والإستبداد
تأملات.. ده من شوية بمبان..!!
ومخجل للغاية أن ينبريء زعيم سياسي كبير ليذكرنا بمبدأ أساسي مثل الحرية لنا ولسوانا
دموع الدم النازف ..عن يوسف أحدثكم3 (لومومبا)
والدتي رأت في المولود جمالاً..بينما والدي قصدَ صلاح سيدنا يوسف